Page:Anonyme - Macaire, chanson de geste.djvu/373

2132—2158

181

Macaire.

« Que soe fille li voillés envoier
« Que il pieça vos dona à moillier ;
« Par grant amor le vos fait il noncier.
« Et se à vos ne la loist envoier,
« Ja tant esmés quant ele puet peser
« Et à fin or vos l’estuet rachater,
« Del millor or qui se porra trover,
« De cil d’Arage, del plus fin et plus cler.
Et dist li rois : « Grief est à otrier.
« Noient ne sui de la dame esperés,
« Et de l’avoir, ja n’en soit mos sonés,
« Que à grant peine seroit tant ors trovés. »
Dist li mesages : « Donc vos estuet penser
« De vos garnir et de vos conréer,
« Que bien vos di por voir et sans boisier
« Mes sire, qu’est et orgueillos et fiers,
« A vos nos mande por vo cors desfier. »
Et dist li rois : « Tot soit en Damedé !
« A no pooir saurons nos cors tenser. »
A ces paroles dist Naimes de Baivier :
« Mesagiers freres, ne vos le quier celer,
« Grant tort en ot vostre emperere ber.
« Depuis que prise a li hom sa moillier
« Ja d’ele à pere ne à mere n’afiert ;
« Cil qu’à espose l’a prise au noçoier
« En puet bien faire tote sa volenté,
« En tant qu’est vive ne s’en puet desevrer,