El gaut ramé por sa vie sauver,
Et vestus ert à loi de pautonier.
Ores s’en vait sor un corant destrier
Et bien armés à loi de chevalier.
S’il ot proece, ne fait à demander.
En sa main tint une anste de pomier
Et à son col un escu de quartier.
Onques Rolans ne li dus Oliviers
Tant ne féirent de proece à prisier
Come le fait par le champ Varochers.
Emmi la voie, par delez un sentier,
Encontré a duc Naimon de Baivier,
Par grant vertu l’a feru Varochers,
L’escu li trenche, ne li vaut un denier.
L’aubers fu bons, que nel pot empirer.
Si très grant cop li done Varochers
Desor l’arçon de la sele derier
Le duc Naimon fait dou tot soploier ;
Mais del cheval ne le puet derocher.
« Sainte Marie ! dist Naimes de Baivier,
« Cil n’est mie hom, ains est li voirs maufés.
« Ja itel cop n’oi mais de chevalier. »
L’espée sache, si se vorra vengier ;
Mais ne le vout atendre Varochers.
Bien conoist il que pas n’est bacheliers,
Son cheval torne, laisse Naimon ester.
Atant es vos Kallemaine au vis fier.
Page:Anonyme - Macaire, chanson de geste.djvu/423
Le texte de cette page a été corrigé et est conforme au fac-similé.
2710—2736
231
Macaire.
