A gran mervile fo pro li çivaler ;
L’un no presia l’autre la monta d’un diner.
A li brandi d’açer anbi dos se requer.
Se l’un e pro, li autre e liçer.
Le armaure, for li heume d’açer,
Sont trençé tros à la çarne cler.
« Sante Marie, dist li Danois Oger,
« A grand mervile e fer ste malfer ;
« Jamai non vi homo de tel aiter.
« A gram mervite e pro çivaler. »
Elo l’apelle sil prist à derasner.
« Çivaler sire, dist li Danois Oger,
« En la corte de le vestre enperer
« Par nome cum vos faites clamer ? »
E cil le dist : « E o nome Varocher.
« Petit el termen qe eo fu çivaler ;
« Eser soloia prima un paltoner
« E in foreste senpre à converser.
« Par un servise qe fi à l’inperer
« El m’a doné le arme e li corer
« E de novel m’a fato çivaler.
« De quella cosa qe mo sta à çeler
