« Com tenrement cele espée est trenchans !
« Qui l’a donée, cil ne m’ama noient. »
Vers Varochers s’en vient iréement, (*)
Grant cop li done desor l’elme luisant,
N’en puet trencher un denier valissant,
Car fu cil elmes et moult fors et tenans.
L’espée torne qui la targe porprent
Atout la guige l’avale jus ou champ,
Et de l’auberc cent mailles en avant.
Trosqu’en l’erbete vait l’espée clinant.
Dou bon Danois fu li cops si très grans
Que sor l’arçon de la sele devant
Se vait trestos Varochers embronchant,
Par un petit ne chaï en avant.
Dieu en reclaime, le pere omnipotent :
« Sainte Marie, roïne raemans,
« Ancui me soies contre la mort garans ! »
Et dist Ogiers : « Me vais tu conoissant ?
« A moi te rent, nen aler plus avant ! »
Dist Varochers : « Vos parlés de noient ;
« Ancor ne sui vaincus ne recréans. »
A icel mot andui li combatant
Se vont requerre atout les brans trenchans ;
L’uns envers l’autre ne se prisent un gant,
Dou bien ferir chascuns se vait aidant.
Page:Anonyme - Macaire, chanson de geste.djvu/453
Le texte de cette page a été corrigé et est conforme au fac-similé.
3084—3108
261
Macaire.
