Quant li ber a oï le covenant,
L’emperéor vait parfont enclinant
Si l’en mercie et bien et doucement.
Se la roïne ot joie, nus nel demant ;
Au duc Naimon ele dist en riant :
« Naimes, fait ele, se je vif longuement,
« De ceste pais atendés grant present ;
« Mais, se vos plaist, me prendés mon enfant
« Et à son pere le menés maintenant
« Que il le voie, que mais n’i fu devant.
— Dex ! dist Ogiers, ci a riche present. »
Adonc la dame ne s’atarge noient,
Où voit son fil parmi la main le prent,
Naimon le livre, et bien et gentement.
Cil prent congié dou roi et de sa gent
Et Varocher en mene à tout l’enfant.
Cist ne s’en fie à nul home vivant ;
Puis que nés fu sel norri bien et gent.
Vont s’ent li mes, n’i font arrestison,
Avec eus menent le petit enfançon
Et Varocher qui fu saiges et bons.
Quant aprismé se sont à l’ost Kallon.
