— Bele, dit Looys, je ne vois mie arriere :
« Bele estes de façon et de cors et de chiere,
« Et je sui povres enfes, si n’ai bois ne riviere,
« N’ai terre ne avoir qui vaille une estriviere,
« Et ma dame est malade ausi com fust en biere,
« Et Varochers, mes peres, qui a la brace fiere,
« Ma dame sert moult bien et de bone maniere.
« Vos peres m’a norri et mostré bele chiere,
« Et si n’ot onc du mien vaillant une lasniere ;
« Mès se Diex m’amendoit qui fist ciel et lumiere,
« Je li randrai à double, trop me fet bele chiere.
« Ralés vos an pucele, ne soiés pas laniere,
« Gardés vo pucelage, trop me semblés legere,
« Que ne vos ameroie por tot l’or de Baviere. »
Quant l’antant la pucele, si fist si mate chiere
Q’ele n’i volsist estre por tot l’or de Baviere.
La pucele fu moult corrociée et marrie
De ce que Looys ne la volt amer mie ;
Tel duel ot et tel honte tote fu enpalie.
Mès Looys n’ot cure d’amor ne druerie.
. . . . . . . . . . . . . . . . . . .
« D’ont estes, de qeu terre ? ne me devés noier.
— Sire, dist la roïne, à celer ne vos qier,
« Droit de Costentinople qui tant fet à prisier,
« Richiers li emperere qui le reine à baillier[1]
« Certes, il m’engendra en sa franche mouillier.
« Challemaine de France fist por moi envoier ;
« Droitement à Paris, an son palès plenier,
« Là si me prist à feme à per et à mollier.
« Un an fui avec lui, à celer ne vos qier ;
- ↑ Vers faux. Il faut lire, selon moi :
Richiers li emperere le regne a à baillier,
Certes, il m’engendra, etc.
