l’ostel ; mais il ne se bouga. Et puis fist prendre à Machaire une piesce de char et la li fist donner au levrier. Et tantost que le levrier vit Machaire, il laissa la char et courut sus à Machaire. Et quant le roy vit cela, il ot grant souspeçon sus lui, si li dist qu’il li convenoit combatre encontre le levrier. Et Machaire si commença à rire. Maiz le roy le fist de fait. Un des parenz d’Auberi vint à la journée, et pour ce qu’il vit la grant merveille du levrier, il dist qu’il vouloit jurer le serment qui est acoustumé, pour le levrier. Et Machaire jura de l’autre part. Si furent menez en l’Isle Nostre Dame à Paris ; et là se combatirent le levrier et Machaire, qui avoit un grant baston à deux mains, et tant que Machaire fut desconfit. Donc manda le roy que le levrier feust retrait arriere, qui le tenoit dessoubz soy. Si fist demander la verité à Machaire, lequel recognut comment il avoit tué Auberi en trahyson et fut pendu et trahyné.
Si trouverez es anciennes Cronicques comme par un levrier fut accusé un Chevalier, non par paroles mais par fait, et dont le cas du meurtre qui ne pou-
