et ne veux plus retarder l’impatience que la reine ma femme a d’en apprendre par vostre bouche. Sur quoy je prendray congé de luy pour aller faire la reverence a la reine.
Apres que je luy eus dit cela, le duc m’embrassa et me dit : « Vous en sçavés plus que nous. Je vous ay offert mon assistance aux affaires que vous venés traitter : mais maintenant je retire la parole que je vous ay donnée ; car sans moy vous les sçaurés bien faire » : et en riant me quitta pour aller porter cet espedient au roy quy le receut, et en usa punctuellement. Le duc revint pour m’ammener a l’audience, et le comte de Carlile marchoit derriere luy. Je trouvay le roy sur un teatre eslevé de dix degrés, la reine et luy en deux chaires, quy se leverent a la premiere reverence que je leur fis en entrant. La compagnie estoit superbe, et l’ordre exquis. Je fis mon compliment au roy, luy donnay mes lettres, et apres luy avoir dit les honnestes paroles, comme je vins aux essentielles, il m’interrompit en la mesme forme que j’avois proposée au duc. Je vis de là la reine, a laquelle je dis peu de choses parce qu’elle me dit que le roy luy avoit permis d’aller a Londres, ou elle me verroit a loisir ; puis je me retiray. Le duc et les principaux seigneurs me vindrent conduire jusques a mon carrosse, et comme le duc m’entretenoit expres pour donner loisir au secretaire [Convé][1] de m’attraper,
- ↑ Inédit. — Édouard Conway, fils de John Conway et d’Hélène Fulke Grevill, créé successivement lord Conway de Bagley, vicomte Killultagh, fut un des secrétaires d’État principaux du roi Charles 1er. Il mourut le 3 janvier 1630.
