pour ennemy depuis mon retour d’Angleterre, sur ce qu’il disoit que j’avois improuvé sa conduitte et plusieurs de ses actions lors qu’il y estoit grand aumosnier de la reine. Cet evesque me rendoit continuellement de mauvais offices aupres de Mr le cardinal de Richelieu quy avoit tout pouvoir, et le rendoit contraire en tout ce quy me concernoit. Mr d’Angoulesme luy proposa a Marolles, lors que le roy y fut malade, que, sy l’on le vouloit envoyer en Poitou avec une simple lettre de cachet pour assembler l’armée (quy consistoit principalement en cavalerie legere dont il estoit colonel), il la remettroit puis apres entre les mains du roy en bon estat a son arrivée, n’y pretendant aucun autre commandement. Sur cela l’on le fit venir a Villeroy, et monsieur le cardinal exposa la proposition de Mr d’Angoulesme [au roy][1], luy disant de plus qu'il jugeoit a propos de luy envoyer. Le roy luy respondit : « Et Bassompierre, que fera il ? Est il pas mon lieutenant general ? » « Ouy, Sire, respondit monsieur le cardinal ; mais comme il n’a jamais eu opinion que les Anglois soint pour faire descente en France, il ne sera pas sy soigneux de mettre promptement vostre armée sur pié, et Mr d’Angoulesme ne pretend aucun commandement en l’armée (comme il vous dira luy mesme), ains de se retirer des que Vostre Majesté viendra, sçachant bien que le commandement en appartient de droit aux mareschaux de France. » Sur cela Mr d’Angoulesme vint, et le roy, pressé, accorda qu’il luy fut donné une lettre de cachet pour commander.
- ↑ Inédit.
