comme lieutenant general et en avoit tiré les gages ; que l’on luy feroit maintenant un grand affront de l’en priver et de le renvoyer, apres y avoir servy le roy trois mois avesques beaucoup de peines et de frais, pour la laisser[1] a Mr de Chomberg et a moy quy avions durant ce temps là passé nostre temps a Paris ; qu’il n’y avoit autre contestation qu'a rayson de l’inimitié que je luy portois a cause de sa sœur ; que je ne ferois pas difficulté d’estre lieutenant general en une armée ou Mr de Guyse commanderoit, et qu’a luy je ne le voulois pas seulement souffrir pour mon compagnon ; que d’autres mareschaux de France avoint bien obei a des princes, comme Mr de Matignon a feu Mr du Maine[2], et Mrs de Brissac, de Boisdauphin et de Temines a Mr de Guyse ; qu’il ne sçavoit quelle chose il y pouvoit avoir en luy quy me causat un tel mespris que je le veuille refuser pour mon egal ; que Mr de Chomberg ne feroit point cette difficulté s’il n’estoit animé et poussé par moy ; et que sy l’on nous donnoit a chascun un travail a faire, l’on jugeroit quy en viendroit le mieux a bout ; qu’il y avoit quarante ans qu’il portoit les armes et qu’il avoit quantité de pouvoirs de general d’armée ; qu’il supplioit finalement le roy de ne luy vouloir faire un tel et sy signalé affront.
Apres avoir finy[3] ses plaintes et ses requestes, le roy envoya querir M. de Chomberg et moy, quy
