estions pendant cela dans sa chambre, et apres que nous fusmes assis, monsieur le cardinal prit la peine de redire en substance tout le discours de Mr d’Angoulesme, a quoy je respondis :
« Sire, des que je vis a ce printemps dernier que Vostre Majesté voulut envoyer Mr d’Angoulesme commander son armée de Poitou au prejudice de Mr de Chomberg et de moy, qu’Elle y avoit nommés ses lieutenans generaux, je jugeay que l’on le vouloit subtilement glisser dans ce commandement sans commission, pour l'y maintenir puis apres avesques commission, et remontray a Vostre Majesté tout ce qu’Elle voit maintenant. Cette mesme rayson me fit insister de demeurer a Paris attendant quelque autre employ, quand Vostre Majesté me commanda de la suyvre en ce voyage ou Elle se vouloit servir de moy en qualité de lieutenant general de son armée, et n’en voulus accepter la charge qu’apres qu’Elle m'eut asseuré, et monsieur le cardinal en suitte, qu’Elle feroit revoquer Mr d’Angoulesme. Elle se souviendra, s’il luy plait, des paroles qu’Elle tint sur ce sujet a Mr de Chomberg et a moy a Saumur, il y a huit jours, qu’Elle ne souffriroit jamais que Mr d’Angoulesme ait autre commandement en cette armée que eeluy de colonel de la cavalerie legere s’il en vouloit faire la charge ; et ne me sçaurois assés estonner comme Vostre Majesté a sy tost changé de volonté en une chose sy juste et sy raysonnable comme je luy feray voir, s’il luy plait de me permettre de luy representer. »
« Mr d’Angoulesme est en cette armée sans patente ny pouvoir. Il l’a commandée depuis qu’il y est sur une simple lettre de cachet. Il a protesté en y venant
