cheux moy, ny aussy le lundy 6me ; mais le mardy 7me je m’en vins voir la digue que Meteseau faisoit travailler de mon costé.
Ce mesme jour il y eut un beau combat proche de la porte de Coygnes entre les Rochelois quy estoint sortis, et Mr du Hallier avec Mr d’Elbene et sa compagnie et Le Chastelier Barlot quy estoit a garder nostre fort de Lafons commencé. Ils rembarrerent bravement les ennemis, et avec morts, et prisonniers qu’ils ammenerent.
Le soir un ingenieur allemand nommé Clarver fit tirer quelques bombes dans la ville. Mais comme il n’estoit pas assés pres, et que ses mortiers n’estoint assés gros, ce fut sans effet.
Le mercredy 8me je fus mandé au conseil. J’allay disner cheux monsieur le cardinal au Pont de la Pierre ; puis nous vinsmes trouver le roy a Netré.
Le jeudy 9me le roy envoya Mrs de Bligny et de Lesché[1] pour luy rapporter l’estat de mon armée laquelle je leur fis voir par regimens affin qu’ils luy en fissent rapport ; car c’estoit le jour de la montre.
Le vendredy 10me monsieur le cardinal me renvoya encores Arnaut[2] pour juger de l'emboucheure du port Neuf et des escluses qu'il y falloit faire pour retenir l’eau douce, ce qu’il revisita encores tout le jour suyvant.
- ↑ N. le Camus, seigneur de Blígny. — N. de la Fontaine, seigneur de Lesche.
- ↑ Isaac Arnauld, seigneur de Corbeville, fils aîné d’Isaac Arnauld, seigneur de Corbeville, intendant de finances, et de Marie Perrin, fut mestre de camp général des carabins de France, comme son oncle Pierre Arnauld. Il mourut en 1651.
