Le samedy 11me la flotte angloise partit devant le jour, moindre de 22 vaisseaux qu’elle n’estoit venue, a cause des bruslots, vaisseaux eschoués, ou ceux ou ils avoint mis le feu.
Le dimanche 12me le roy continua de se trouver mal.
On fit jouer deux mines a Tadon[1].
Le lundy 13me je me fis saigner. Monsieur le cardinal revint. Le roy se leva, et laissa l’ordre necessaire a la ville. On avoit mis tous les canons de la ville a la place du chasteau en nombre de soissante et seise de toutes sortes.
Le mardy 14me le roy donna l’ordre que devoit tenir la garnison et vint voir la parade a la place du chasteau.
Le mercredy 15me on tint conseil apres disner pour les licentiemens et les routtes de nos trouppes. J'eus encor querelle avec le roy pour les gens de guerre.
Je fus soupper cheux Effiat.
Le jeudy 16me le roy m’envoya querir dans son conseil estroit, ou il me dit que pour le bien de son service il convenoit qu’il fit raser plusieurs places de son royaume, comme Saintes, Niort, Fontenay[2], et d’autres, puis abboutit a la citadelle de Ré qu’il dit estre sy forte que, sy un des deux rois ses voysins l’avoit occupée, il luy seroit presque impossible de la reprendre, et qu’il suffisoit en cette isle de Ré le fort
