de la Prée pour la garder ; qu'a cet effet, estant du departement que j’avois, il m’en avoit voulu parler affin de le proposer et faire aggreer a Toiras, a quy il vouloit donner bonne recompense. J'approuvay le dessein du roy : mais je luy dis que c’estoit une chose quy devoit partir de la bouche propre de Sa Majesté, et que sy Elle l’envoyoit querir et luy disoit, que je m'asseurois qu’il le prendroit de bonne part. Lors on le fit venir, et le roy luy parla : il eut promesse de deux cens mille livres, d’estre payé de ce quy luy estoit deu, recompensé des armes et munitions quy se trouveroint dans la place, et que le roy luy payeroit le vaisseau que les Hollandois luy avoint retenu. Il demanda quelque employ, et je proposay de luy donner l’armée a conduire jusques en Italie.
Le vendredy 17me le roy tint conseil, se fut promener a la tour de la Chaine.
Je fus prendre congé de monsieur le cardinal, le roy ne m’ayant voulu laisser aller devant luy a Paris, me disant qu’il me vouloit presenter aux reines. Monsieur le cardinal partit ce jour là pour aller a Richelieu.
Le samedy 18me le roy partit de la Rochelle et vint coucher a Surgeres ; le dimanche a Niort ; le lundy a Partenay ; le mardy a Touars ; le mercredy a Saumur, ou le jeudy 23me nous fismes nos pasques a Nostre Dame des Ardilliers, puis coucher a Langeais ; le vendredy disner a Tours, coucher a Amboyse ; le samedy a Marchenoir[1], le dimanche a....[2], et le lundy
