jours apres les reines se rendirent peu apres la Toussaints, et on ne vit point la reine mere les deux ou trois jours apres son retour, estant logée a Luxembourg.
Novembre. — Le roy la vint voir de Versailles le samedy 9me de novembre, et pour plus grande commodité s’en vint loger a l’hostel des ambassadeurs proche dudit Luxembourg, et monsieur le cardinal quy estoit venu dans le mesme batteau de la reine en grande privauté avec elle, revint aussy quand et le roy a Paris, et logea au petit Luxembourg.
J'ay sceu depuis, et Dieu me punisse sy auparavant j'en avois eu autre connoissance qu’en destail seulement, que quelquefois la reine et monsieur le cardinal estoint brouillés, quelquefois en parfaite intelligence ; j'ay sceu, dis je, depuis, que souvent le roy faisoit ses plaintes a la reine sa mere de monsieur le cardinal, et reciproquement la reine au roy, [qu’en fin deux ou trois fois elle avoit dit au roy][1] qu’elle vouloit ouvertement se brouiller avec luy et sortir de sa tutelle, c’estoint ses termes, et que le roy de temps en temps l'avoit priée de dilayer, ce qu’elle avoit fait, et qu’au retour du roy a Lion, le roy applaudissoit en quelque chose a la reine, quy neammoins l’avoit priée d’attendre encores jusques a leur retour de Paris[2] ; que le roy ayant veu a Rouanne la resolution de monsieur le cardinal d’attendre la reine mere, luy avoit escrit de luy faire fort bonne chere, comme elle avoit fait ; et que le dimanche 10me, veille de la Saint Martin, le roy estant venu le matin voir la reine sa mere, je luy
