payent l’ammende. » Je luy dis : « Monsieur, ne prenés pas garde a ce que dit Monsieur : il ne fait que ce que Puilorens et Le Coygneux luy conseillent, et quand vous voudrés tenir Monsieur, tenés le par eux, et vous l’arresterés. » Il ne me dit en suitte aucune chose de sa brouillerie[1] ; aussy Dieu me confonde sy je m'en douttois seulement. Apres soupper j’allay voir madame la princesse de Conty, ayant veu auparavant coucher le roy quy n’en fit aucun semblant : je luy demanday s’il partiroit le lendemain ; il me dit que non. Je trouvay madame la princesse de Conty en telle ignorance de cette affaire que seulement elle n’en parla pas, et j'oserois bien jurer qu’elle n’en sçavoit rien.
Le lundy 11me, jour de la Saint Martin, je vins de bonne heure cheux le roy quy me dit qu’il s’en retournoit a Versailles. Je ne songeay point a quel dessein. J'en avois fait d'aller disner avec monsieur le cardinal que je n’avois peu voir cheux luy depuis son arrivée, et m'en allay vers midy en son logis : on me dit qu’il n’y estoit pas, et qu’il partoit ce jour là pour aller a Pontoyse. Encores jusques là je ne pensay a rien, ny moins encores quand, estant rentré a Luxembourg monsieur le cardinal y arrivant, je le conduysis jusques a la porte de la chambre de la reine et qu’il me dit : « Vous ne ferés plus de cas d’un desfavorisé comme moy. » Je mm’imaginay qu’il vouloit parler du mauvais visage qu’il avoit receu le jour precedent de Monsieur. Sur cela je le voulus attendre pour aller disner avec luy ; mais Mr de Longueville me desbaucha pour aller disner cheux Mr de Crequy avec Monsieur, comme il
- ↑ Avec la reine-mère.
