estoit indubitable des qu’il auroit mandé qu’il seroit pres de luy, où il s’en alloit en toute diligence ; et de fait partit en mesme instant, bien en peine de cet accident dont il ne fut esclaircy qu’en arrivant a Saumur qu’il trouva heureusement Monsieur en la mesme hostellerie ou il venoit coucher, et despescha aussy tost a la court pour y faire sçavoir ces bonnes nouvelles, et que Monsieur estant allé voir le comte du Lude, ils s’en estoint de là allés a Machecou voir Mr de Rets. Mais pour cela ma liberté n’en fut pas avancée.
Peu apres l’armée du roy quy s’assembloit aux environs de Mesieres sous la charge des mareschaux de Chastillon et de Bresé, entra dans les païs du roy d’Espaigne par le païs de Liege, et le prince Tomas de Savoye s’estant avancé avec une armée inegale pour s'opposer a leur passage leur presenta la battaille a Avain[1] ou il fut deffait le 20me de may ; et en suitte nostre armée se joignit a celle des Estats de Hollande commandée par le prince d’Orenge[2], prindrent Diest et Tierlemont[3], en laquelle ville, prise d’assaut, furent commises des cruautés et meschancetés effroyables : les François disent que ce furent les Hollandois, et eux, sans s’en excuser, disent que les François n’en firent pas moins qu’eux. Ils perdirent beaucoup de temps inutilement, et donnerent loisir aux Espagnols
- ↑ Avein, village du Luxembourg, situé à deux lieues de Rochefort.
- ↑ Henri-Frédéric de Nassau, prince d'Orange, fils de Guillaume, comte de Nassau, prince d'Orange, et de Louise de Coligny, sa quatrième femme. Né le 24 février 1584, il mourut le 14 mai 1647.
- ↑ Diest, Tirlemont, villes du Brabant méridional. Diest capitula le 14 juin, après la prise et le sac de Tirlemont.
