Les nouvelles vindrent aussy que le roy de Hongrie avoit esté esleu roy des Romains le 22me de ce mois, et que l’on n’avoit peu rien entreprendre sur les isles de Saint Honorat de Lerins, et de Sainte Margueritte, comme nostre armée navale en avoit eu commandement de la court.
Le 19me decembre la grand duchesse Chrestienne[1] est morte agée de 74 ans : elle estoit petite fille de la reine Caterine de Medicis, fille du duc Charles de Lorraine : et le 22me de ce mesme mois Ferdinand 3me, roi de Hongrie et de Boheme, a esté nommé roy des Romains a la diette de Ratisbonne[2].
Au commencement de l’année 1637 l’eslongnement de Monsieur et de Mr le Comte, et les accidens que l'on craignoit quy en pouvoint arriver, ne me permirent pas seulement de penser a faire parler de ma liberté, sçachant bien que mes peines et mes soins en cette sollicitation y seroint inutiles : a quoy aussy je n’estois gueres porté, quoyque mes amis me fissent instance de la faire poursuyvre ; car la mauvaise et indigne response que monsieur le cardinal avoit faite a ma niece de Beuvron apres que, luy ayant escrit une sy humble et summise lettre, je l’avois envoyée faire une tentative, lors que les ennemis passerent la
