monsieur le prince pres de luy, nous fismes mettre toute nostre infanterie en battaille entre Saint Jory[1] et Boussolengue, border d'infanterie des deux costés le bourg, et le pont par ou le prince devoit passer, fimes mettre douse compagnies de cavalerie en bel ordre en la plaine quy est entre Boussolengue et Suse, et moy je fus par dela Saint Jory avec les gensdarmes, chevaux legers du roy, et la compagnie d’Arnaut, avec mes gardes et force noblesse, recevoir monsieur le prince, puis le menay par devant nostre infanterie quy luy fit salve et le salua. Mr de la Vallette estoit a la teste. De la nous passames a travers de Boussolengue et vinmes ou estoint les douse compagnies de cavalerie, ou estoit aussy Mr le mareschal de Crequy entre les mains duquel je le resinnay pour l’ammener au roy. Mrs de Longueville, de Moret, d’Aluin, de la Vallette et de la Trimoulle quy voulurent venir avec moy au devant de monsieur le prince ne le voulurent saluer qu’apres que je luy eus fait la reverence. Tous ces messieurs le quitterent quand et moy et revindrent au quartier de Boussolengue, ne nous ayant point quittés depuis que nous partimes d’Ambrun.
Monsieur le prince disna a Suse avec monsieur le cardinal avec lequel il traitta et conclut toutes choses, et entre autres, que l'on mettroit la citadelle de Suse et les forts de Jallon et de Jallasse entre les mains du roy, qu’il garderoit jusques a ce que toutes choses fussent concertées en Italie ; qu’il y mettroit des Suisses, et que je jurerois au duc de remettre lesdites places
- ↑ San-Giorio, village sur la rive droite de la Doire, à peu de distance et au-dessous de Bussolengo.
