puis ayant passé par delà Boussolengue, elle trouva Mr de Crequy et Mr de la Trimoulle avec dix huit compagnies de chevaux legers. Je la consinnay es mains de Mr le mareschal de Crequy quy la conduisit jusques a ce que le roy la joignit, quy vint au devant d’elle, et avoit fait mettre en battaille douse mille hommes de pié ausquels il fit faire devant elle plusieurs evolutions, puis la conduisit au chasteau de Suse, ou elle et monsieur le prince son mary furent logés et deffrayés.
Le jeudy 22me je tombay malade et me fis saigner.
Guron revint de Casal[1] et ammena les deputés de la ville avec luy, que je fis loger et deffrayer a Boussolengue.
Le vendredy je pris medecine, mon mal me continuant.
Le samedy je me fis encor saigner. Monsieur le prince de Piemont alla et revint de Veillane a Suse : il me fit l’honneur, en retournant, de me venir visiter.
Le dimanche 25me mars, jour de Nostre Dame, monsieur le prince de Piemont fit ses pasques a Suse avec l'habit de l’ordre de Saint Maurice.
Le 26me le roy envoya le pere Josef a Mr de Mantoue, et Argencourt avec Guron au Montferrat[2]. Je continuay d’estre malade.
Le mardy 27me je me fis encores saigner.
Le mercredy 28me Toiras partit pour aller a Lorette.
Le jeudy 29me, commençant a me mieux porter, le
