la liberté de la riviere du Rosne qui avoit esté depuis plusieurs années incessamment troublée par ceux qui estoient dans cette ville, en laquelle ont pris naissance les troubles et factions excitées en divers temps en ce royaume par les rebelles de la religion pretendue refformée. Ayant faict sauver les femmes, je n’ay peu denier le pillage de la ville a mes soldatz qui m’ont servi si courageusement en cette occasion ; mais, chose estrange, quelques deffences rigoureuses que j’ay peu faire et quelque soing que j’aye faict aporter pour empescher que la ville fust bruslée, ayant faict esteindre le feu par diverses fois, elle a esté enfin toutte consommée, et Dieu a voulu qu’elle portast des marques perpetuelles de sa longue rebellion. Ce que je plains, est la perte que j’ay faicte d’aucuns des officiers de mon armée et de ma noblesse, que je regrette plus que je ne puis dire, entre autres des marquis d’Uxelles et de Portes, mareschaux de camp, Marcillac, cappitaine au regiment de mes gardes, Espagne lieutenant, et dix ou douze autres officiers et gentilshommes de marque ; mais telles actions ne peuvent arriver sans perte et mesme de ma noblesse que je ne puis retenir, et qui se porte dans les perils avec tant de hardiesse et de valleur, qu’il ne peut qu’il n’en demeure tousjours quelques uns, lesquelz sont estimez des autres heureux de mourir glorieusement en la presence de leur roy et pour le bien de l’estat. Je veux esperer que la suitte de mon voyage sera plus douce, et que l’obeissance volontaire plustost que l’exemple me conviera a user d’autant de clemence et de bonté envers ceulx qui s’y porteront d’eux mesme, que la rebellion et opiniastreté de ceux cy m’a contrainct à mon grand regret d’user de severité et de rigueur contre eulx. C’est de quoy je prie Dieu de tout mon cœur et qu’il vous tienne, Monsr de Nouailles, en sa saincte garde. Escript au camp de Privas, ce dernier jour de may 1629.
- Signé : Louis.
- Bouthillier. »
- Signé : Louis.
(Lettres, etc., à Mr de Noailles par les rois, etc. T. II, fol. 365. Bibliothèque du château de Mouchy-Noailles.)
