JOURNAL DE MA VIE
Apres que toute la court fut rassemblée a Paris vers le commencement de l’année 1629, on commença aussy a rompre la pratique du mariage de Monsieur avec la princesse Marie, et luy en parler fermement, a quoy il se resolut, et promit de s’en desister tout a fait pourveu que l’on luy donnat moyen de le faire avec honneur ; et pour cela il proposa que l’on luy donnat la charge de faire lever le siege de Casal qu’y avoit mis trois mois auparavant don Gonsales de Cordova[1] gouverneur de Milan, ce que la reine mere luy fit accorder par le roy, quy luy fit en mesme temps un don de cinquante mille escus pour se mettre en esquipage d’aller estre vicaire du roy en Italie avec une puissante armée quy desja s’y acheminoit, et estoit bien avancée. Il trouva bon que l’on envoyat a Mr de Mantoue affin qu’il envoyat querir madame sa fille et qu’elle partit quinse jours apres qu’il se seroit acheminé a l’armée.
- ↑ Gonsalez de Cordova, troisième fils d’Antoine-Ferdinand Folch de Cardona et Cordova, IVe duc de Soma, Ve duc de Sessa, et de Jeanne de Cordova, mourut en 1645.
