trouverois pour faire ma proposition, j'envoyay un secretaire interprete du roy, nommé Molondin, a la diette, leur parler de ma part pour leur remontrer qu'ayant convoqué les deputés de tous les cantons en une assemblée au nom du roy pour des affaires concernantes le bien de leurs republiques et de la couronne de France, j'avois appris que le chancelier d’Alsasse en qualité d’ambassadeur de l’empereur, du roy d’Espaigne et de toute la maison d’Austriche, estoit arrivé a Solleure pour y intervenir, et troubler ma negotiation, ce quy m’avoit obligé de leur envoyer dire que, comme cette diette avoit esté convoquée par moy au nom de Sa Majesté tres chrestienne et pour ses affaires particulieres, je leur requerois que ledit chancelier d’Alsasse, venu contre le service de mon maitre, n’y fut admis, ny receu, et qu’au cas qu'ils se resolussent de luy donner audience, je n’en voulois point avoir, et remettrois dans quelque temps, ou de convoquer une autre diette, ou de m'en passer tout a fait, laissant celle cy audit chancelier pour y traitter les affaires de la maison d’Austriche, demandant que sur ce sujet l’assemblée en veuille opiner et m'en rendre response auparavant que j'entre a la diette pour y faire ma proposition.
Apres que Molondin eut remontré de ma part les choses susdittes, il se retira, et lors il y eut de grandes contestations dans l’assemblée, les partisans d'Espaigne remontrans que c’estoit une chose nouvelle et inouie de chasser un ambassadeur d’une diette generale, et un ambassadeur d’un empereur, d’un roy d’Espaigne, et de la maison d’Austriche avesques laquelle, outre l'alliance hereditaire, il y en a tant d’autres particu-
