audience, et que luy mesme me viendroit voir et reparer la faute qu’il avoit faite de ne m'avoir rien mandé ; que de plus il se sentiroit mon obligé de cette concession qu’il tiendroit de moy.
Ils deputerent donc vers moy pour me faire ces offres ausquelles je respondis qu’au nom et de la part du roy mon maitre j’avois demandé l’exclusion de cet ambassadeur, et qu’il n’estoit plus en moy de retracter ce que j’avois dit de sa part sans luy faire sçavoir, ce que j'offrois de faire et de leur en dire fidellement la response sy ledit ambassadeur la vouloit attendre a Solleure, et que je luy respondrois de l'avoir du roy dans huit jours.
Ils virent bien que je me moquois de luy par ma response. C'est pourquoy avec quelques honnestes excuses ils luy donnerent son congé, qu'il prit avesques des grandes menaces qu’il fit contre la Suisse ; et moy j'entray avec Mr de Leon dans la diette en laquelle je fis amplement ma proposition : puis apres, la diette en corps m’estant venue trouver pour me remercier, je leur fis a tous un superbe festin.
Le mercredy 6me l’assemblée envoya vers ce chancelier d’Alsasse luy dire qu’elle ne le pouvoit admettre a la diette quy estoit convoquée au nom et par le roy de France, mais que quand il en demanderoit une pour la maison d’Austriche, que l’on luy accorderoit, en laquelle il pourroit faire ses propositions et demandes, sy mieux il n’aymoit attendre la generale quy se tiendroit a Baden[1] a la Saint Jean prochaine. Il s’en
- ↑ Baden, chef-lieu de district du canton d’Argovie.
