ont toujours accoustumé d'employer avec Berlinguer, me vint trouver en fort bel esquipage. Je le fis disner avec moy, et apres disner m’ayant demandé audience m’offrit de servir la France sy je luy voulois donner employ. Je le remerciay et luy offris pension et esperance d’employ. Je ne sceus descouvrir s’il le faisoit pour me tenter et descouvrir, ou pour me tromper, ou finalement pour donner ombrage et jalousie de luy aux Espagnols.
Le vendredy 22me le dit Flechenstein alla voir et disner avec Mr de Léon, et luy parla comme il avoit fait a moy. Affry gouverneur de Neufchastel arriva[1].
Le samedy 23me le colonel Flechenstein vint prendre congé de moy, et me confirma ce qu’il m’avoit desja dit.
Je despeschay Affry a Fribourg, luy ayant asseuré que je le ferois colonel d’un des regimens de la levée.
Le mercredy saint 27me de mars, comme Mr de Leon et moy estions aux Tenebres aux Cordeliers, un courrier de monsieur le cardinal arriva, quy m’apporta la rupture entre Savoye et le roy avec l’entrée de monsieur le cardinal en armes dans le Piemont[2], comme il avoit passé la Douere et s’en alloit assieger Pignerol[3] ; qu’il m’exhortoit de mettre promptement six mille Suisses sur pié, et qu’il avoit escrit au roy pour m’envoyer des forces et une patente de general pour mettre la Savoye en son obeissance.
