La noit fe los mesatges e anar e venir
Per monstrar e retraire e diire e somonir
Lo sen e la semblansa, don cuidero guerir
Aisi que sa doctrina lor a faita obezir ;
E al mati a l’alba, cant pres a l’esclarzir,
Lai fors a Vilanova los an mandatz venir,
Pla a l’albor del dia.
Pla a l’albor del dia, cant parec la clartatz,
Lai dedins la maizo cominal n’ac assatz
Dels milhors de la vila, dels rics e dels ondratz,
Cavaler e borzes e la cominaltatz.
E cant foro ensemble e lo critz fo baissatz
L’abas de S. Cerni als primer razonatz,
El prior el prebosdes que li este[c] de latz,
E maestre Robertz .I. legista senatz :
« Senhors baro, » ditz l’abas, « Deus, vera trinitatz,
« E la verges Maria, de la qual el fo natz,
« E mosenher l’avesques nos a sai enviatz,
« Que es trist e maritz e dolens e iratz
« Car l’afars de la vila es peritz e torbatz ;
« E mas que d’ambas partz es lo glazi tempratz,
« Sant Esperit i venga ab la sua clartatz,
« Qu’entre vos e lo comte meta bo cor e patz,
« Que ja degus no sia falhitz ni enganatz !
« E si vos o voletz nius agrada nius platz,
« Lo vostre acordamens es empres e parlatz ;
« Car mosenher l’avesques vos a tant razonatz
« Que vencut an lo comte entr’el e caritatz.
« Tant vos defen l’avesques que lo coms n’es iratz.
