assez souvent, lequel l’on pourroit bien voir quelque matin, la paix estant faicte, pour les obligations et malversations qu’ils avoient commis depuis que la guerre est commencée.
— Laissons là les qualitez, Mesdames, dit la quinquallière ; qui bien fera bien trouvera. Si les financiers ont desrobé l’argent du roy, comme il y a de l’apparence, le conseil en sçaura bien faire la recherche ; et ce faisant, le proffit qu’ils auront faict ne sera qu’un emprunt qu’il faudra rendre avec les interests.
— Il semble que vous sçachiez les particularitez de ces Messieurs, dict là-dessus la belle pourpointière.
— Ce que j’en sçay, repliqua la quinquallière, c’est le receveur que j’ay tant aymé qui m’en a compté une partie, et le reste, ç’a esté le sieur Gesselin, comme je discourois avec luy de la belle Angelique, qu’il a tant de peine à marier.
— Mais, à propos, Madame, dit la marchande de passement, la fille de laquelle vous parlez est-elle aussi jolie qu’elle estoit lorsque le sieur advocat la recherchoit en mariage ?
— Il s’en faut plus de la moitié, luy respondit la quinquallière, et si je doubte d’elle ce que je ne veux publier, pour le respect du sexe.
Comme ceste parole s’achevoit, la femme d’un procureur de la Cour, demeurante en l’Université, entre dans la chambre suivie d’une petite
