Page:Machaut - Le Voir Dit, 1875.djvu/133

[vers 1759]

79

DU VOIR-DIT.

Et de nous .ii. feroie change,
Et le menroie devant elle
Telement & à tel cantele ^{[App. XX.]}
Qu’on diroit : « Veſcy voſtre ami, »
Pour véoir s’elle aroit de mi
Congnoiſſance, & qu’elle diroit,
Ne quel ſemblant elle feroit.
Et celle méiſme penſée
Eſtoit en ſon cuer enfermée,
Si com elle l’a congnéu
Depuis ce que je l’ay véu.
Mais ne fu pas fait enſement,
Et ce fu le mieus vraiement.
Briefment je vins en ſa preſence :
Et quant je vi ſa contenence,
Sa manière, ſon bel acueil,
Son dous vis & ſon riant oeil,
Et ſa coulour blanche & vermeille,
Et ſon gent corps qui à merveille
Eſtoit lons & droit & traitis,
Envoiſiés, cointes & faitis,
Et j’oÿ ſa douce parole
Qui n’eſtoit eſtrange ne fole,
Ainſois me diſt : « Mon dous ami,
« Venez avant, parlés à mi ;
« Vous ſoiez li tres-bien venus !
« Longuement vous eſtes tenus
« De moi viſiter & véoir.
« Venez ça delez moi ſéoir. »
Et ſi me priſt de ſa main blanche
Trop plus que la noif ſur la branche.
Et quant elle me ſalua
Par nom d’ami, mes cuers mua