Le droit jour que j’y dévoie eſtre.
Et la belle bien le ſavoit,
Nonpourquant, partir ſe devoit.
Si, devins melencolieus,
Triſtes, penſis & enuieus ;[1][App. XXXIII.]
Et recommençay ſans delay
Mon veu, que je point ne delay ;[2]
Mais le fis de triſte matiere,
Toute contraire à la premiere.
Long ſont mi jour & longues ſont mes nuis,
Et quanque voy me deſplaiſt & anoie,
Quant ce ne voy que trop me fait d’anuis ;
Long ſont mi jour & longues ſont mes nuis.
C’eſtes vous, belle ; Amours & tu me nuis,[3]
Quant en larmes mes dolens cuers ſe noie ;
Long ſont mi jour & longues ſont mes nuis,
Et quanque voy me deſplaiſt & anoie.
Amis, bien voy que tu pers tous deduis,
Pour ce qu’il faut que face ceſte voie ;
Dolente ſuis quant ſi po te deduis.
Amis, bien voy que tu pers tous deduis.
Mais au retour, ſe Dieus plaiſt & je puis,
Je te donray pais, & ſolas & joie.
Amis, bien voy que tu pers tous deduis,
Pour ce qu’il faut que face ceſte voie.
