voie par devers vous pour ſavoir voſtre bon eſtat, lequel vueille Noſtre Seigneur tousjours faire ſi bon comme je le deſire de tout mon cuer, & comme vous meiſmes le vorriés ! & par m’ame je ne puis attendre d’envoier à vous ; & du mien plaiſe-vous ſavoir que je fuſſe en tres-bon point, ſe je vous péuſſe veoir touſdis. Mais quant je ſuis & ſeray loing de vous, & il me ſouvient de la tres-douce paſture & ſade nourreture dont vous m’avés ſi doucement nourry & repéu, & ſe j’ay & aray po de joie & de léeſce, nuls ne s’en doit mervillier. Toutevoie, je me conforte en ce que onques encor ne fu qui encores ne ſoit, ſe Dieus plaiſt. Et, mon tres-dous cuer, je ſui nices & rudes, au départir de vous : ſi, le me vueillez pardonner quant je ne vous ſceus mercier ; pour ce que, en l’ame de mi, je eſtoie ſi pris & ſi ſouſpris, que je ne ſavoie qu’il m’eſtoit advenu, pour le grant miracle que la Déeſſe fiſt en noſtre préſence. Et toutes les fois que je y penſe, je en ſuis tous esbabis, auſſi de voſtre grant humilité. Car ſe je eſtoie li plus biaus, li plus ſages & li plus parfais du monde, ſi m’a Dieus & vous bien pourveu ; ne je ne ſuis mie dignes de deſſervir le plus petit des biens que vous m’avés fait : & je prie à Dieu qu’il me doint, avant la mort, que en jour de ma vie, je ne face ne die choſe qui vous doie deſplaire. Si vous prie, pour Dieu, mon dous cuer, qu’il vous ſouveingne de moy ; car par m’ame je ne vous vorroie ne porroie oublier ; & ſe je le voloie, Deſirs ne me lairoit ; car, par Dieu, onques je ne vous deſiray tant à véoir des .c. pars comme je fais & feray ; & il y ha bien cauſe. Et ce ſera quant Dieu plaira & je porray, & non pas quant je vorray, Dieus le ſcet. À dieu mon tres-dous cuer, qui vous doint joie & honneur & ſanté.
Mais elle ne fu periſſeuſe
De reſcrire, ne mal ſongneuſe,
Ains me reſeript par le meſſage
