Car il ne me laiſſoit durer
En egliſe, n’à champ, n’à ville.
Si me ſembloit choſe trop vile
De vivre en tele peſtilance ;
Ne Dous penſer, ne Eſperance
Ne pooient avoir victoire
Encontre li, c’eſt choſe voire ;
Ainçois nous .iii. deſconfiſſoit,
Dont ſouvent mes cuers gemiſſoit.
Quant je vi la deſconfiture,
Je fis tantoſt celle eſcripture
Et ſi, l’envoiay à ma dame ;
Car je n’avoie confort d’ame,
Ne nuls ne ſavoit la doulour
Qui faiſoit palir ma coulour.
Si qu’à plourer me confortoie,
C’eſtoit tout le bien que j’avoie.
Mon cuer, ma ſuer, ma douce amour,XXIII.
Oy de ton ami la clamour.
Mon cuer, ma ſuer, ma douce amour,
Voy comment je pour toi demour ;
Fay tant qu’o toi ſoit mon demour.
Mon cuer, ma ſuer, ma douce amour,
Oy du grand deſir la rumour
Qui fait en mon cuer ſon demour.
Mon cuer, ma ſuer, ma douce amour,
Fay qu’avec toy face ſejour.
Mon cuer, ma ſuer, ma douce amour,
Fay que j’aie encor un bon jour.
Mon cuer, ma ſuer, ma douce amour,
Oy de long comment pour toy plour.
Mon cuer, ma ſuer, ma douce amour,
Voy comment pour toy je m’eſplour.
Mon cuer, ma ſuer, ma douce amour,
Tari le ruiſſel de mon plour.
