Mon cuer, ma ſuer, ma douce amour,
Eſtain de Deſir la chalour.
Mon cuer, ma ſuer, ma douce amour,
Amenuiſe ſa grant rigour.
Mon cuer, ma ſuer, ma douce amour,
Ajes pité de mon labour.
Mon cuer, ma ſuer, ma douce amour,
Met en ton tres-dous cuer tenrour.
Mon cuer, ma ſuer, ma douce amour,
Voy ma peine, voy mon labour.
Mon cuer, ma ſuer, ma douce amour,
Voy comment pour t’amour labour.
Mon cuer, ma ſuer, ma douce amour,
Voy ma tres-amere triſtour.
Mon cuer, ma ſuer, ma douce amour,
Voy mes meſchiés, voy ma dolour.
Mon cuer, ma ſuer, ma douce amour,
Conſidere ma grant fréour.
Mon cuer, ma ſuer, ma douce amour,
Voy que de mort ſuis en paour.
Mon cuer, ma ſuer, ma douce amour,
Regarde comment je m’atour.
Mon cuer, ma ſuer, ma douce amour,
Voy comment je pleur en deſtour,
Mon cuer, ma ſuer, ma douce amour,
Pour ton cointe corps fait à tour.
Mon cuer, ma ſuer, ma douce amour,
Voy qu’en toy ſunt touſdis mi tour.
Mon cuer, ma ſuer, ma douce amour,
Voy comment pour toy deſcoulour.
Mon cuer, ma ſuer, ma douce amour,
Ouvre le flun de ta doucour,
S’arouſe ma pale coulour.
À Dieu mon tres-dous cuer, qui vous doint joie, pais & tout le bien que voſtres cuers deſîre.
