Et ſans doubtance onques puis je ne vi
Riens qui péuſt mettre en envoiſéure
Moy ne mon cuer ; & c’eſt drois, que ſans li
Ne quier avoir nulle bonne aventure,
Ne joie, n’alligement ;
Car à li ſuis donnés ſi ligement
Que je ne fis onques puis chiere lie,
Tant me fiſt mal de li la departie.
Amis ſi parfaitement
Suis à vous donnée.
Que c’eſt ſans departement
Et ſans deſſevrée,
Ne, tant com j’aray durée,
Mes cuers ailleurs ne ſera,
Et s’il eſt autre qui bée
À m’amour, il y faurra.
Car ſi amoureuiement
Suis enamourée
De vo gracieus corps gent,
Qui ſeur tous m’agrée,
Que pour créature née
Mes fins cuers ne vous laira,
Et s’il eſt autres qui bée
À m’amour, il y faurra.
Si qu’avés certeinement
Toute ma penſée,
Et m’amour entierement
Eſt en vous fermée ;
Ne pour longue demourée
Mes cuers ne ſe changera ;
Et s’il eſt autres qui bée
À m’amour, il y faurra.
