« Qu’adès devant euls en alaſſent,
« Et darrier euls ne regardaſſent.
« La feme Loth mal ſe garda,
« Car darrier elle regarda,
« Et tantoſt elle fut muée
« En ſel, c’eſt vérité prouvée ;
« Car en ſa forme & ſa figure
« Eſtoit de ſel ſon eſtature.
« Joſephus le teſmongne, & dit
« Qu’en ce point pluſeurs fois la vit.
« Auſſi li Dieu les gens muoient
« En quelque forme qu’il voloient,
« Et les Déeſſes enſement :
« Car on véoit appertement
« Les uns mués en forme d’arbre,
« Les autres en pierre de marbre.
« Perſéus qui par l’air voloit
« Se muoit en ce qu’il voloit ;
« Politetus le deſpriſoit,
« Et partout de li meſdiſoit ;
« Mais en pierre ſi le mua,
« Qu’onques puis ne ſe remua,
« Par le chief Gorgon qu’il gardoit :[1]
« Qu’ame ce chief ne regardoit
« Que en pierre ne fuſt muée,
« Tant fut ſoutive ne deſrée.
« Ovides le dit en ſes fables,
« En moralitez veritables.
- ↑ Le chief, la tête de Méduſe la Gorgone, qu’aucune âme ne pouvoit regarder, &c. Voy. Ovid. Metam., lib. V. vers 242.
