Et bien l’avoie deſſervy,
Quant ainſi l’avoie ſervy.
Car pechié fis & negligence,
S’en ſouffroie la penitence.
Petit au lire s’arreſta,
Pour ce qu’en un feu les geta.
Et l’envoy deſſus vous enforme
Qui eſtoit de lettre de forme :
XXX. — Helas ! mon dous cuer, je vous avoie pluſieurs fois dit que je n’eſtoie pas dignes de vous ſervir. Si avez fait pechié de moy ſi loier en vos laz qui jamais ne ſeray deſliez. Et vous le ſavez bien & je m’y ſuis folement embatus. Mais, mon dous cuer, je cuidoie bien faire. Mon dous cuer, vous m’avez mandé de bouche & par eſcript que je envoiaſſe point vers vous jusques vous envoieriez vers my, & j’ay obéi à voſtre commandement qui m’a eſté & eſt moult dure choſe ; pour ce que je ne ſavoie mie la cauſe. Mais je penſe que on vous ait blaſmé ou dit aucune choſe de my, ou que vous me vueilliez eſlongier de vous. Car qui de po aime de po het. Non mie que vous ſcéuſſiez haïr moy ne autrui, mais qui bien aime à tart oublie, & de pou pleure à qui la leppe pent. Et, par Dieu, je ne vous ay pas oublié, car j’ay fait pour amour de vous, depuis la Magdelaine,[1] ce que je ne cuidoie mie faire en un an ; ainſi come cils meſſaiges le vous dira, s’il vous plaiſt à oÿr. Dont je ne dors nuit ne jour ſe po non, que adès n’y labeure & ne me ſouveingne de vous. Mais puis que matere me fault il me convient laiſſier oeuvre.[2] Et ne penſez mie que on le m’ait dit ; car expérience
