m’eſt avis que c’eſt le meilleur, ſelon le pays là où on eſt. Ma ſuer ſe recommande à vous. Je vous pry que vous me recommandez à mon frere, le voſtre. Mon tres-dous cuer, je prie à Dieu qu’il vous doint honneur & joie de quanque voſtre cuers aime. Eſcript le .ve. jour de may.[App. LXVI.]
Ne ſoiez en nul eſmay,
Amis n’en merencolie,
Car tant come je vivray
Vous ſeray loyal amie.
Car amours qui tout maiſtrie
Veult que ſoie ſanz partir
Voſtre juſques au mourir.
Si vous pri que tenir gay
Vous vueilliez à chiere lie,
Et croire que ſans delay
Sur moy avez ſeigneurie
Tant com amans ſur amie
Puet avoir ; que ſans mentir
Voſtre ſuis juſqu’au mourir.
Et ſitoſt que vous verray,
Je vous promet & affie,
Que tous vos maus gariray
Et auſſi ſeray garie.
Que trop m’eſt tart que vous die,
Mon dous cuer qu’aim & deſir,
Voſtre ſuis juſqu’au mourir.
Quant de ma dame vi l’envoy,
Je dis : Helas dolens ! bien voy
Que j’ay vers ma dame meſpris,
Et qu’en autre maniere a pris
