Cuers qui fauſſement aime en rit,
Et cuers qui aime loyaument,
En pleure ; car certainement
L’un ou l’autre convient acroiſtre,
Entre les mondains & en cloiſtre.
Et de tel piet & de tel dance
Com li uns va, li autre dance.
Si me pris tous ſeuls à complaindre,
Et de mon grant deſir à plaindre,
Si que profondement penſoie,
Et en penſant ymaginoie
À ceuls dont j’ay devant parlé,
Ce ſont Piramus & Tisbé.
Il furent enclos en .ii. tours,
Si qu’il ne fu voie ne tours
Qui leur oeil péuſt avoier
Pour euls enſemble esbanoier.
Trop leur deſplaiſoit cils demours,
Si que force & rage d’amours
Dont il eſtoient yvre & plain
Fiſt tant qu’il iſſirent ad plain,
Pour euls deſduire & ſolacier,
Baiſier, acoler, embracier :
Et en la fin en furent mort,
Enſemble de piteuſe mort.
Amours Leandon ſi laçoit[1]
Qu’un bras de mer à no paſſoit,
Pour véoir ſa dame & s’amie,
En la fin en perdi la vie.
- ↑ Enlaçoit Léandre.
