Page:Machaut - Le Voir Dit, 1875.djvu/345

[vers 7106]

291

DU VOIR-DIT.

« Mais il n’eſt pas en tout couvert,
« Ainſois eſt tout à deſcouvert ;
« N’il n’a maiſons, chambres ne ſales,
« Fors cavernes ordes & ſales,
« Eſquelles li maufés ſe boute,
« Quant ſaoulée eſt ſa panſe gloute.
« À ſeneſtre a un aviron
« Lonc de .c. piez ou environ,
« Et gros à l’avenant, ſans faille,
« Dont il retourne ſon aumaille.
« Et quant il voit le ſoleil luire,
« Et li maufés ſe vuet deduire,
« En ſa main prent une flahute
« De .c. roſeaus dont il flahute.
« Mais quant il la vuet fort ſonner,
« Mer & terre fait reſſonner,
« Entour lui .iii. lieues ou .iiii.
« Ainſi ſe ſcet li bers esbatre.
« Mais, loing & près, tous ceus qui l’oient
« De ſon encontre ſe deſvoient.
« Par amours amoit Galatée
« Qui le haoit plus que riens née,
« Pour ſa façon vile & orrible
« Qui eſtoit hideuſe & terrible ;
« Et pour ſon dous amy Acis,
« Que li mauvais avoit ocis
« En traïſon & par boidie,
« Par fureur & par jalouſie.
« Car une roche li rua
« Si qu’il le deſtruit & tua.
« Auſſi éuſt-il Galatée,
« S’il péuſt, honnie & tuée ;
« Mais Galatée s’enfuy