« Monſtre qu’Amours n’eſt onques morte
« Ne ſeche, ains eſt toudis nouvelle
« Et verte, ainſi comme lentelle[1]
« Qui en yver ſa verdeur cuevre,
« Et en temps d’eſté la deſcuevre.
« Ainſi l’amour qui eſt couverte
« Doit eſtre au beſoing deſcouverte.
« La lettre dit que ſans remort
« Dure Amours à vie & à mort.
« Ce que dou doy ſon cuer enſeigne
« Dit quil eſt voirs, comment qu’il preigne ;
« Et la lettre qui eſt entour
« Diſt, qu’en preſence & en deſtour,
« Soit près, ſoit loing, amis ſera
« Qui parfaittement aimera.
« Mais je ſuis à dire tenus
« Pourquoy elle a les piez tous nus.
« Veſcy pourquoy : ſon chief, ſa face
« Sont deſcouvert en toute place,
« À celle fin que chaſcuns voie
« Qu’en chambre n’en ſale n’en voie,
« N’a chief ne cuer qui ſoit couvert.
« Pour ce ſont li pié deſcouvert.
« Auſſi, que chauſſe ne ſouler
« Ne doit attendre pour aler
« Vers ſon amy, ſe beſoingnier
« À de li, ne riens reſſoingnier,
« Ronce, pierre, groe, n’eſpine.
« Telle eſt Amour qu’eſt vraie & fine,
- ↑ Lentille, plante légumineuſe bien connue.
