Quant il ot dit tout ſon plaiſir
Longuement & à grant loiſir,
Je ne fui mie moult haſtis
De reſpondre ; car amatis
Eſtoit mon ſens & mon memoire
Plus aſſez qu’on ne porroit croire.
Car tuit li membre me trembloient,
Et my oeil tenrement plouroient.
Si que ne ſavoie que dire,
Tant avoie de dueil & d’ire.
Auſſi m’avoit uns miens amis,
Qu’avoie vers elle tramis,
Eſcript, piece a, que la laiſſaſſe
Et que d’elle mon cuer oſtaſſe,
Sans querre eſſoingne n’eſlongne ;
Car ce n’eſtoit pas ma beſongne.
Si qu’à ces .ii. choſes penſoie,
Et enſemble les aſſembloie ;
Et me ſembloit bien voir ſemblable
Que de perſonne ſi notable
Com dou ſigneur qui là eſtoit,
Qui ſi mes grans amis eſtoit,
Et com l’autre, que je créuſſe,
De quanque faire à voir péuſſe,
Autant com moy ; & au ſeurplus
Il m’amoit, ce croy, encor plus
Que li ſires qui me blaſmoit
De ce que mes cuers trop amoit.
Que ce n’eſtoit truffe ne ſonge,
Fable, contrueve ne menſonge,
Ains falloit de neceſſité
Qu’il en déiſſent vérité,
Ou qu’aucune choſe en ſcéuſſent :
Page:Machaut - Le Voir Dit, 1875.djvu/357
Le texte de cette page a été corrigé et est conforme au fac-similé.
[vers 7460]
303
DU VOIR-DIT.
