Quant elle a fait nouvel amy.
Lors pour allegier ma dolour,
Qui taint & palit ma colour,
Je fis ceſte balade-ci
À cuer taint & malade, ſi
Plein d’amoureuſe maladie,
Que meure en eſt la melodie.[1]
Se pour ce muir qu’Amours ay bien ſervi,
Il fait mauvais ſervir ſi fait ſignour,
Car je n’ay pas mort d’amour deſſervi
Pour li amer de tres-loial amour.
Mais je voy bien que finé ſont mi jour,
Quant je cognois & voy tout en apert
Qu’en lieu de bleu, dame, vous veſtez vert.
Helas ! dame, je vous ay tant chieri
En deſirant de mercy la douçour,
Que je n’ay mais ſens ne povoir en mi ;
Tant m’ont miné mi ſouſpir & mi plour.
Et m’eſperance eſt morte ſans retour,
Quant Souvenir me monſtre à deſcouvert
Qu’en lieu de bleu, dame, vous veſtez vert.
Pour ce maudi les yeus dont je vous vi,
L’eure, le jour & le tres-cointe atour,
Et la biauté qui ont mon cuer ravi,
Et le plaiſir enyvré de folour.
Et ſi maudi Fortune & ſon faus tour,
Et Loyauté qui ſueffre & à ſouffert
Qu’en lieu de bleu, dame, vous veſtez vert.
Ne demoura pas longuement,
- ↑ Meure ſemble avoir le ſens muſical de en mineur.
