C’uns meſſages, ſoudeinnement
Vint à moy droit enmy la rue,
Et diſt : « Vo dame vous ſalue,
« Et vous envoie ceſte lettre,
« Où l’en ne puet oſter ne mettre
« Mot ne ſillabe ſans meſprendre :
« Or la vueilliez lire & entendre. »
Quant il m’ot dit tout ſon ſalu,
J’ouvri la lettre & ſi la lu :
XL. — Tres-chiers & tres-dous amis, j’envoie pardevers vous pour le tres-grant & parfait deſir que j’ay de oÿr aucunes bonnes nouvelles de vous, leſquelles Noſtre Sires, par ſa grace, me doint oïr telles come mes cuers le deſire ; car je n’en oï nulles depuis la Chandeleur. Et ſi, vous ay depuis eſcript & daireinnement par voſtre ſecretaire ; & ſi li dis pluſeurs choſes de bouche leſquelles il vous devoit dire ; & ſi me promiſt qu’il feroit tant pardevers vous que j’en aroie brieſment reſponſe. Mais vous n’en avez riens daignié faire ; dont il me ſemble pour certain que vous m’avez de tous poins guerpie & miſe en nonchaloir, & que vous n’avez mais nulle amour à moy. Si avez tort & faites mal & pechié ; car je pri à Dieu que jamais ne me doint honneur & joie de choſe que je li requiere, ſe onques, n’en dis n’en fais n’en penſée, je fis riens vers vous pourquoy me déuſſiez ainſi laiſſier, ne mettre mon cuer en ſi grant deſtreſſe come il eſt pour vous. Si le povez bien ſavoir, & ſi ne vous en chaut, ne il n’eſt nul remede que vous y vueilliez mettre. Et par Dieu, mon dous cuer, mes cuers ne fu onques vers vous ytels. Car je n’os onques bien ne joie tant come je ſcéuſſe voſtre cuer à meſchief, & que tantoſt que je le ſavoie, je ne méiſſe peine de vous conforter à mon pooir. Et je croy que vous ſavez bien le grant meſchief que mes cuers a pour vous, & ſi, ne vous en chaut de riens : dont j’ay plus grant merveille que je
