Du damoiſel & de la belle,
Comment il les avoit trouvé
Preſentement en fait prouvé.
La Corneille qui l’encontra
Pris ſon vol en ſon encontre a,
Moult enquiſt où voler vouloit
Qui ſi haſtivement voloit ?
Li Corbiaus tantoſt li reſpont
Et de chief en chief li eſpont
De Coronis tout l’avoutire,
Et dit qu’à Phebus le va dire,
Car pas ne vuet celer la honte
De ſon ſigneur, qu’il ne li conte.
Quant la Corneille l’entendi
Elle diſt : « Corbiaus, tant t’en di,
« Se me croies, tu n’iras pas ;
« Arreſte & vole par compas,
« Et enten ce que je diray,
« Car jà de mot n’en mentiray.
« Tous voirs ne ſont pas biaus à dire :
« Cuides-tu que Phebus, ton ſire,
« Ne ſoit dolens & à meſchief
« Et qu’il n’ait bien mal en ſon chief,
« Quant tu li diras villennie
« De Coronis qui eſt s’amie ?
« Cuides-tu qu’il t’en ſache gré,
« Et t’en mette en plus hault degré ?
« Nennil voir, ainſois t’en harra,
« Et jamais bien ne te vorra.
« Et l’image qui parle a dit[1]
- ↑ L’image, le portrait de Peronnelle. Machaut eſt bien hardi de
