En Theſſale ot une pucelle
Qui eſtoit avenant & belle,
Et de grace la plus loée
Qui fuſt en toute la contrée ;
Née en la cité de Laurice[1]
Fu, ſi n’eſtoit rude ne nice ;
Ains eſtoit cointe, aperte & ſage,
Et eſtraite de haut lignage.
Coronis ot nom la meſchine.
Phebus l’en amoit d’amour fine,
Si fermement & de tel cuer
Qu’il ne l’oubliaſt à nul-fuer.
Mais elle amoit un damoiſel
Plus que Phebus ſon blanc oyſel.
Brief riens tant n’amoit autre choſe :
Bien y parut à la parcloſe ;
Car li Corbiaus les vit enſemble,
Joins par nature, ce me ſemble,[2]
Que chaſcuns prenoit ſon deſduit,
Si com nature les y duit.
Quant li Courbiaus vit l’avoutire,
Il les commença à maudire,
Et ſi jura grant ſairement
Qu’il yroit dire iſnellement
À Phebus la grant lecherie
Qu’il a véu en ſon amie.
De ſes ailes l’air accola,
Et ſans plus dire s’envola
Pour dire à Phebus la nouvelle
Page:Machaut - Le Voir Dit, 1875.djvu/374
Le texte de cette page a été corrigé et est conforme au fac-similé.
318
[vers 7785]
LE LIVRE
