Il ne fait que jangler & braire.
« Sire, m’avez-vous entendu ?[1]
« Vous ay-je bien raiſon rendu
« Du Corbel & de la Corneille ?
« Se Dieus me gart, trop me merveille
« Comment vous créez telles bourdes.
« Avoir devez oreilles lourdes,
« Envers tous ceus qui vous apportent
« Telles paroles & enortent ;
« Et c’eſt pechié contre nobleſce,
« De croire choſe qui tant bleſce
« Qu’on en pert l’onnour & la vie,
« Et l’amour de ſa douce amie.
« Se vous les voulez croire ainſi,
« Vo dame ocirez de ſouſſy,
« Et puis vous en repentirez,
« Et .c. foiz encor maudirez
« La journée & ceus qui le dirent,
« Et les oreilles qui l’oïrent,
« Le lieu le damage & la perte ;
« Qu’evident ſera & apperte,
« Si com Phebus. Mais c’eſt à tart ;
« Si que, pour Dieu, aiés regart
« À Phebus qui ſe repenti
« De Coronis qui li menti ;
« Car ſa foy l’y avoit plevie
« Qu’autre n’ameroit en ſa vie.
« Pluſt à Dieu que ceuls qui ce font,
« Et qui amour ainſi deffont
« Par faus & par mauvais rappors,
« Deveniſſent ſauvages pors ;
- ↑ Ici l’Image reprend ſes exhortations.
