S’il eſt voirs ce qu’on m’en a dit.
Autrement ne di-je en mon dit.
Et toutevoie, doit Confort
Querir cils qui a deſconfort.
Si que, pour moy deſanuier,
Pris un livret à manier
Qu’on appelle Fulgencius,[1]
Si trouvay Titus-Lyvius
Qui de Fortune deſcriſoit
L’image, & ainſi diſoit :
Jadis les matrones de Romme
De leurs teſtes, ſans conſeil d’omme,
Un temple à Romme edifierent,
Et en l’onneur le dedierent
De la déeſſe de fortune.
Son image au gré de chaſcune
Firent en fourme & en ſemblance
De femme, pour ſon inconſtance :
Car c’eſt choſe aſſez veritable,
Que trop eſt femme variable.
L’image que ci vous devis
Fu belle de corps & de vis :
Deux petis cercles à ſa deſtre
Avoit, & .ii. à ſa feneſtre ;
Et un grant qui environnoit
Les .iiii. petis & tenoit.
- ↑ Fulgentii Fabii Planciadis Mithologiarum libri III, ad Catum præsbyterum. Mais il n’y a rien de pareil dans les Mythologies de Fulgence, & je n’ai pas découvert où Machaut avoit trouvé ce qu’il va mettre ſur le compte de Fulgence & de Tite-Live.
