Le quint cercle qui environne
L’image, abat ceptre & coronne,
Et met tout à deſtruccion.
Cy a dure concluſion,
Voire à ceus qui ne la deſpriſent,
Ainſois l’aiment, ſievent & priſent.
Et veſcy la droite eſcripture
Que Tytus Livius figure :
Penſe & regarde qui je ſui,
Quant tu le ſaras hé-m’ & ſui.[1]
Ainſi vi l’image deſcripte
De Fortune, qui trop deſpite
Het, honniſt, deſtruit & deçoit
Tous ceus qu’en ſa garde reçoit.
Si que longuement y penſay :
Et tout ceuls en mon cuer tenſay
Qui m’orent d’amer eſméu
La belle qui m’a decéu ;
Si que ma joie en ſera morte,
S’il eſt voirs ce qu’on m’en raporte.
Et, par ma foy, j’en ſuis en doubte.
S’appliquay ma penſée toute
À comparer ma dame chiere
À Fortune & à ſa maniere,
Et la comparay, par tel guiſe,
Com je ci-après le deviſe.
- ↑ Quand tu le ſauras, hais-moi & fuis. Quid fui dicerne, cum scieris me fuge, ſperne.
