Page:Machaut - Le Voir Dit, 1875.djvu/402

346

LE LIVRE

quant il plaira à Dieu que nous nous puiſſiens veoir. En laquelle choſe je penſe à mettre tele diligence & bonne ordenance qui bien vous plaira. Mon dous cuer, vous dites que uns bien grans ſires & pluſeurs autres vous ont moqué par esbatement de moy & de tel que vous ne congnoiſſiez. Et, par Dieu, je ne fis onques choſe que nuls péuſt ſavoir l’amour que j’avoie à vous, & ſe j’en ay dit ou fait choſe qui ne ſoit bonne à faire, vueilliez le moy mander & y mettre tele ordenance come bon vous ſemblera ; & je vous promet loiaument que je la tenray. Mais, pour Dieu, ma tres-doulce chiere amour, pour choſe qu’on vous die ne vueilliez penſer ne croire que je ne vous ſoie bonne & loial amie, tant come je vivray. Que, par le Dieu qui me fiſt, de la journée que je vous dis que ſe je povoie prenre mon cuer dedens mon corps & le vous mettre en voſtre main, je le vous bailleroie afin que vous en fuſſiez plus ſeur, je le vous donnay & le mis en vous ſi parfaittement que je pourroie auſſitoſt avoir & eſrachier tous les dens de voſtre bouche ſans vous malfaire, & ſans ce que vous en ſcéuſſiez riens, come je pourroie y avoir ne oſter mon cuer de vous que je vous ay donné. Et auſſi, par Dieu, ne vueil-je mie ; car il me plaiſt mieus qu’il ſoit en vous que en nul home qui ſoit vivant au monde. Si, en povez ou devez eſtre tous aſſéur. Mon dous cuer, je vous pri que vous me vueilliez eſcrire de voſtre eſtat & le plus ſouvent que vous pourrez, & s’il puet eſtre bonnement que je vous voie. Car, en vérité, ſe Dieu m’avoit donné .i. ſeul ſouhait en ce monde, je ne ſouhaideroie riens fors vous veoir. Car c’eſtoit tout mon deſir & toute ma penſée, ne je ne cuide avoir parfaitte joie, juſques à l’eure. Mon dous cuer, vueilliez ſavoir que je n’ay point véu le vallet que vous m’avez eſcript que vous m’envoiaſtes, eu mois de may, ne n’en ay oÿ nulles nouvelles. À Dieu, ma tres-chiere amour qui vous doint paix, ſanté, honneur & joie de quanque voſtre cuer aime. Mon chier amy je vous envoie ce virelay qui eſt fait de mon ſentement, & vous pri que vous me vueilliez envoier des voſtres.