« Mais tous jours pers ou aſur fin
« Portera juſques à la fin.
« Auſſi, vous l’avez comparée
« À Fortune la forſenée,
« Et dit ce qu’il vous a pléu ;
« Elle & moy l’avons bien ſéu.
« Mais ne lairay que je ne die
« Que vous avez fait villenie,
« D’einſi parler en grant ſimpleſce ;
« Car chaſcuns le tient à rudeſce.
« Comment que toudis aiez dit :
« S’il eſt voirs ce qu’on m’en a dit.
« Si que ſa cauſe vueil deffendre,
« S’un petit me voulez entendre.
« Et, pour ce, comparer vous vueil
« À Fortune : car, à mon vueil,
« Tres-bien comparer vous y puis.
« Et veſcy comment je la truis. »
Li Paien anciennement
La figuroient autrement
Que vous ne l’avez figuré ;
Car en eſcript ſa figure hé :[1]
Il avoient une cité
Noble & de grant auctorité,
Là eſtoit com déeſſe & dame
Fortune, en figure de fame,
Emmy une roe qui tourne,
- ↑ Hé, j’ai.
