Venir faiſoient en la place
Sus la fontaine .v. pucelles,
Vierges, juenes, cointes & belles,
Veſtues precieuſement,
Et aceſmées richement.
Et chaſcune qui là venoit
Une fleur en ſa main tenoit.
Chaſcune chantoit à ſon tour
Une chanſon par grant douçour.
Pour adoucir la grant rigueur
De la déeſſe & ſa fureur,
Les vierges .v. ſignes avoient
Par leſquels vraiement ſavoient
Se leur prière eſtoit oÿe
De la déeſſe, & eſſaucie.
Vez-ci le ſigne & la maniere
De l’iaue, au chant de la primiere.
Quant la fontaine ſe mouvoit,
En ſon ſort la vierge trouvoit
Que ſa chanſon & ſa requeſte
Tenoit pour juſte & pour honneſte.
S’au chant de la vierge ſeconde,
La fontaine afflue & habonde,
C’eſt à dire que la Déeſſe
Promet honneur, joie & richeſce.
S’au chant de la vierge pucelle
Croiſt & s’enfle la fontenelle,
La Déeſſe eſt pacefiÿe
Apaiſantée & adoucie.
Page:Machaut - Le Voir Dit, 1875.djvu/410
Le texte de cette page a été corrigé et est conforme au fac-similé.
354
[vers 8693]
LE LIVRE
